發燒

Q: 點解我哋會發燒？

A: 發燒喺身體對抗病源體嘅武器之一，較高嘅溫度可以令免疫系統更加有效地運作，亦不利病源體繁殖及生存。當病源體入侵身體時，白血球會釋放出細胞素 (cytokine)，指示下丘腦 (hypothalamus) 的體溫協調區域去提升體溫，引致發燒。

Q: 點解發燒嗰陣會打冷震、出汗？

A:「起燒」嗰陣，體溫低於腦部的設定值 (set point) ，令身體作出各種反應去提升體溫。例如肌肉會不停收縮，產生熱量。腦部令我哋有冰冷嘅感覺，所以想去着多啲衫或冚被保暖。呢個就係「打冷震」嘅原因。

退燒嘅情況剛剛相反。此時體溫高過腦部設定值。身體會大量排汗，幫助散熱。

Q: 點解「退完燒又發番燒」？

A: 其實大部份人發燒，體溫都會時高時低，唔會長時間停留喺同一個高溫。一般嚟講，體溫連續24小時低於38.0度，先至可以算係「退燒」。

Q: 發燒應該點樣處理？

A:

1. 穿着較薄及鬆身嘅衣服，幫助散熱

2. 保持室溫涼快及空氣流通

3. 多飲水，補充因發燒而額外流失嘅水份

4. 用濕毛巾抹身（切記用冰水）可幫助降溫

5. 盡早睇醫生，搵出發燒嘅原因。並根據醫生嘅指示服食退燒藥及其他藥物

Q: 💥咩時候要入院處理？💥

A: 

• 發燒高過 40.0 °C 🥵

• 小朋友冇晒精神，唔肯食嘢或玩 😵‍💫

• 嚴重頭痛、頸緊、抽筋或神志不清 (可以是腦炎、腦膜炎病徵)

• 出現紅疹或細小出血點

• 呼吸困難或心口痛 (可以是嚴重肺炎、心肌炎等)

• 嚴重胃痛、肚痛 (可以是腹膜炎病徵)

Q: 小朋友發燒真係會燒壞腦？

A: 雖然極端高溫 (>42°C) 會對腦部造成永久傷害。但大部份感染引起的高燒都甚少會高過40.5°C。而發燒是身體對抗感染的正常機制。至於「發燒會燒壞腦」呢種講法，可能是由於舊時較多由腦炎、腦膜炎引起的發燒個案，呢類中樞神經系統感染確實有機會令腦部永久受損。另一個原因，是約4%的兒童 (通常發生在6個月至3歲) 會在發高燒時出現熱痙攣 (俗稱「發燒抽筋」或「急驚風」) 的情況。熱痙攣不會對腦部造成永久傷害，但情況相當令家長驚慌失措。因而有「發燒會燒壞腦」之說。